Home S'istoria kie semus Repertoriu Cuntzertos Imágines Crámanos
Su cantu a cuncordu
Modalidade de cantu
Sas cunfradías
Sa Kida Santa
Sitos amigos

Istoria de Sos Cantores

..duas rias subra de sa formatzione de su coru Sos Cantores e de sas pretzedentes generatziones de cantores, e ki ant permítidu sa transmisione de custos maravizosos cantos.

 

 

Google

Sos Cantores aesegus de sa Maria 'e sos Dolores. (1979)

Bona keddha 'e annos ai como su númeru e sos cantores cumparadu a díes de oje fuit majore, tant'est ki donzi Cunfradía teníat su coru sou ki intonaíat sas notas de su Stabat Mater in fatu de sa Maria ki l'apartenet. Su Miserere, in cambiu, lu cantaíant tottu paris alternandhesi in fatu 'e su Jesus. Sas Cunfradías sighíant donzuna una carrela drivessa, e in custa manera rugaíant sas carrelas ei sos buturinos de sa iddha unas kimbe o ses Portisciones, a segunda 'e su númeru de sas Cunfrarías, e a últimu totu cantas atopaíant a sos logos de sas funtziones (ki no fuint totus sos matessis de sos de oje pro cambios naskidos dae pagu a s'internu 'e sas Cunfrarías). In díe 'e oje, a dolu mannu, sa situatzione no es comente assoras: oje su númeru 'e sos cantores s'est reduídu e pro custu totu sos coros si sun reunidos totus in d'unu, infatu de sa Maria 'e sos Dolores, e cantan una 'orta per ómine comente si faghíat, e si faghet ancora, infattu e su Jesus cun su Miserere.
Narant sos mannos, ki dogni coru teníat cun sos atteros coros unu raportu de isfida e de zelosia, e ki podíat finzas imbater a s'hostilidade. B'at de narrer ki custu sentimentu addhurat in s'ánimu de sos cantores novos, de sos zóvanos, e custu, mancari parzat un ategiamentu malu, tenet una cara positiva: custa tendhentzia a fagher menzus de sos áteros, a cantare cun kie iskit cantare, e a síghere sos ki dimustran sa capatzidade de póder imparare, o síat sende zelosos de su ki s'iskit, eccetera, est su ki at cunsentidu e permítidu sa cunservatzione de su cantu in sos annos trasmitindhelu pro via orale solamente.
Pro custa resone est presente in totu sos cantores una kirca continua a cara a desegus, kircandhe s'antigu, pro imprarare sos cantos de sos betzos, e connosker sas froriduras caraterísticas de cuddhu o de cuddh'áteru cantore.

Finas a deghe annos ai como su númeru de sos coros ki cantaíant in Kida Santa si fuit reduídu a tres, pero in su 1996 una paggia de pitzinnos de una edade intro sos séighi ei sos degheoto annos, ki teníant in cumune una profundha passione pro su cantu e, a prus de cussu, ki fuint particularmente interesados a custu ramu de su patrimoniu culturale cuglieridanu, detzidit de incumintzare a imparare custu cantu, iskindhe pero de cantu totu custu síat importante in sa traditzione de sa iddha.
Custu patrimoniu de altisimu balore culturale benit tramandhadu sólu pro via orale, grassias solamente a sa disponibilidade de sos cantores, ki s'ética issoro lis imponet de transmiter totu su ki iskint a sos cantores novos pro permiter ki custos cantos no tenzant mai una fine.

Sa cumplesidade de sa zenía de su cantu cuglieridanu est sa cáusa de sa seletzione ki ke lassat a fora a pessones medas. Difatis nonostante su cantu a custas pessones lis piagat meda e sa passione ke los apat leados finzas a si presentare e a proare, a dolu issoro no sunt bistadas giuigadas addhatas a poder leare sa cosa bene dae fundhu pro diventare cantores de Kida Santa, custu o pro kistiones de origa o ca sa passione fortzis no fuit meda gai comente paríat a s'incuminzu. In totu sos áteros ambientes, mancu a lu narrer, sunt semper totu sos benénnidos, e sos prus a ndhe tenner piaghere semus nois. A prus de custa seletzione bi ndh'at un'átera, et est sa de su públicu. Difatis no sunt totus ki sunt capazos de poder cumprendher custu tipu de cantu in sa cumplesidade sua. Pro nos cumprendher, sos iscultadores espertos sunt realmente pagos, sa mínima parte, sos iscultadores atentos podent esser paritzos,

ma sos distratos podent esser sos prus et est difizile ki custos risultent a cumprendher e apretziare. A bortas pero sunt sos primmos ki criticant. Pro custu sos ki zeneralmente benin a intendher sos cantos de Kida Santa est zente ki giai los connosket dae innantis, zente ki los at istudiados o ki los est istudiandhe, pessones ki tenent totu cuddhas connoskentzias ki lis permitint de iscultare e cumprendher totu sos particulares de su cantu sacru cuglieridanu. Difatis in sas díes de Kida Santa a giru é sos cantores b'at semper pessones de custa zenía, etnomusicólogos e istudiosos cun micrófonos panorámicos e registradores. Pro sos prus de custos sa Kida Santa est un apuntamentu fissu dae paritzos annos. Bidu su carátere elitariu de custu tipu de cantu, nois rifiutamos totu sas bessidas ki tenzant comente repertoriu su cantu sacru si su cuntzertu no est programadu aintro de una cresia o de unu teatru o símile. Custu cantu no est addhatu a sa piata, sa idea ki mentras si cantant Miserere e Stabat Mater sa zente siet kistionandhe distratu e a tatza in manu (comente fuit sutzessu a amigos de un áteru coru sardu) no ndhe faghet pesare s'artuddha.
In custas fotografias si podet bíer ki b'at variatziones in s'istimenta de sos cantores: difatis, po cantu s'iscat e si potat testimonzare, sos cantores an semper bestidu cun ábidos burghesos, elegantes cantu si kerzat pero fora 'e s'ambiente de sas cunfrarías. In sos annos 2001 e 2002, a causa de sa zente meda, ki aprus de totu aíat leadu su malu vissiu de s'amuntonare infatu e s'Addolorada e de su Jesus (in ue bi tían tever bistare sólu sos cantores) e creaíat problemas subra 'e tottu in su mamentu de su cambiu 'e turnu da unu coru a s'atteru, sos cantores aímos dezisu de nos ponner un ábidu símile a su 'e sas cunfrarías ma ki no esseret propiu a su 'e nisciuna: ábidu biancu e kintorza nieddha. Custu sólu pro nos distíngher dae su restu de sa zente. Pero, bidu e cumproadu ki totu custu no fuit servindhe a nudda, e ki a prus de totu fuit foras de sa usanzia, aímis dezisu, a cabu 'e duos anos, de torrare a coa e de nos torrare a ponner in bistimenta, torrandhe tandho a "su cantu 'e su populu" comente l'aíat definidu unu famosu artista ki donzi annu enit a nos fagher vísita in Kida Santa.
In donzi casu cuss'ábidu lu sighimos a zugher in sas seradas, candho nos kircant a foras pro cantare cantos de Kida Santa, pero no in kida Santa.