Kie semus..

Daniele Giallara, Anzelu Agos, Zusepe Motzo, Antoneddhu Cubadda.

Sos mannos. No ant connotu ne cd ne mp3, solu carki registratzione in casseta fata cun d-unu registradore "Geloso" ki méntuvant semper, ma su sonu no fuit semper pulidu. Cussa za fuit "kie ndhe tenet ndhe 'utiat"! Kie ke colaíat podíat diventare unu cantore. Bastat de pensare a su 'e tenner ite peleare cun omines de cussa zenía, de cussa severidade, ki pretendhíant respetu ca respetu lis aíant pretesu a issos sos mastros issoro, cantores ki si atopaíant dogni sero e cantaíant po su piaghere de cantare, ki a sos zovanos imparaditzos cuasi mancu los abaidaíant e ki a repiter su passagiu po kie no l'aíat cumpresu no fuint dispostos meda, fortzis po evitare ki esserent imparadu su cantu tropu mecánicu, e finzas unu pagu po zelosía. Kie poderaíat binkíat, e medas ant bínkidu e como sunt cantores. Est beru ki su ki bi keríat fuit primmu 'e totu s'origa, e meda, ca si nono no si andhaíat a denanti, pois pero bi keríat sa passentzia, sa constantzia, e subr'e totu su respetu. Mai presse, ne arrogantzia, ne barra, ne mustradura. A narrer sa veridade tenzo carki duda ki totu nois, sos ki semus de sa zenerassione noa, essemes pótidu superare cussu séberu. Siguramente no totus.

Zusepe Idda, Franziscu Nurchis, Zuanne Fara, Zusepe Falchi, Pipinu Sulas.

Sa zenerassione noa, mancari oramai siat sa 'e mesu si consideramos sos pitzinnos ki sunt benindhe como. Sas registratziones como sunt medas, e medas in dizitale, sunt sa cosa menzus, sa manu santa. Bi ndh'at de onzi manera, betzas, noas, cun sonu limpiu o bruttu, e cun múidas de onzi tipu (zente faeddhandhe, etc.). No si podet negare ki cun custas ebía unu tíat pódere imparare meda, pero no abastat. Difatis a su matessi modu ki pro cumpréndere unu testu de universidade tocat de ténnere nessi s'iscola elementare o sas medias, pro pódere retzire totu sos passagios ei sas violeras ki sunt cuasi cuadas aintro 'e custas registratziones, subra 'e totu de sas prus betzas, tocat de aer fatu una gavetta inúe si suponet ki si epat betadu unas bonas fundhamentas addhatas a cumprender cussas modas, si nono in cussas registratziones parent totu imbreagos, comente narat calicunu. A dolu mannu pero su 'e ténnere registratziones medas, a bortas abacat sa gana de andhare a sas provas, s'interessu ei s'oriolu po fághere sas cosa comente importat, e i su peus est candho cussas registratziones mancu s'iscurtant, si no ki si ponent in d-un oru e tocat, e po cussu sos passagios ei sas violeras addhuran in códighe binariu ei su cantore no madurat, e a prus de totu b'est su perígulu ki si perdat in caminu.
Anzelu Agos, Antoneddhu Cubadda, Zusepe Motzo, Gianfranco Nurchis, Giuseppe Pes.

Sos imparaditzos novos, su vivaiu. Pro issos est ancora prus fázile, tenent a dispositzione totu sas registratziones ki nois amos acoltu in totu custos annos, e a prus de totu trascritas in dizitale pro ki no si guasten e pulidu su sonu de sas prus bruttas, bi lis damos cumintzande dae sas prus limpias e fáziles de iscurtare e de cumpréndhere. Sos cantores espertos los iscurtant e currezent, sos candhidados no sunt medas e duncas sas possibilidades ki custos pitzinnos tenent de diventare cantores creskent. In sa seletzione su séberu si redúit semplizemente a sos ki no sunt isorigados e distonados, e ki dimustrant nessi apena apena de interessu e responsabilidade. Su fatu est ki como si podet narrer ki síat cuasi totu a s'imbesse de comente fuit innantis: si innantis s'interessu totale fuit de sos ki keríant imparare, como sunt sos propios cantores ki kerent imparare custos cantos a piciocos novos pro impidire ki si perdant e ki siant ismentigados, e pois pro evitare ki pois apustis de annos, candho no si los ammentat prus cuasi nisciunu, calicunu ndhe los torret a bogare a campu cun cussas operatziones de "riscoperta" e "restauru", ki deo a nárrer sa veridade no suporto pro custa resone: ca primm'e totu naskent cun motivos de gloria e de inari, e pois ca sas prus bortas no sunt átera cosa si no imbentziones copiandhe da inoke e da incuddhane, kenza perunu respetu pro sos ki sa traditzione l'ant mantesa. 
Sos piciocos iskint giai cantu síat fázile a si pérdere, e no sólu a s'incumintzu cando unu s'abizat de esser istonadu (candho si ndh'abizat..) o candho bi lu faghent a cumprendher sos áteros, o puru candho ancora no iskint si 'interessu est reale, ma iskint ki est fázile a si pérdere finzas prus aenanti e po kistiones ki no b'intrant nuddha cun s'origa e cun su cantu. Iskint cantu síat importante s'armonía, ma no sólu sa ki nasket dae sa unione de sos sonos, ma fintzas cussa ki si tepet agatare aintro de su coru, in mesu'e sos cantores s'unu cun s'áteru, pro ki su coru andhet bene. Nois su caminu bi lis amus ammustradu, como tocat a issos a ponner passos.